تابع أسرار الطبخ

نصائح مطبخية "2"

السؤال الأول
ليه البفتيك بيطلع ناشف؟!

ساعات كتير لما آجي أحمر أو أشوي شرائح البفتيك تتطلع ناشفة معايا بالرغم من إني لما باكلها بره بتكون طرية فياريت أعرف حل للمشكلة دي؟!

شوفي يا قمر لو عايزة البفتيك يطلع طري معاكي زي اللي بتاكيله بره يبقى ياريت تضيفي معلقتين خل إلى تتبيلة البفتيك وتخلطيها بالفتيك لمدة 5 ساعات.. بعد كده تشويه أو تقليه وهتلاقيه بقى طري وطعمه في منتهى الجمال..

السؤال الثاني
ليه الثوم مش بيتقشر بسهولة؟!

ياريت حد يرد عليّ أنا كل ما آجي أقشر ثوم ضوافري تتكسر لأن قشر الثوم اللي عندي ناشف وبيتقشر بصعوبة لدرجة إني كرهت أي أكل فيه ثوم علشان مشكلة التقشير دي يا ترى فيه حل؟!

الحل بسيط جدا كل اللي عليكي أنك تنقعي الثوم اللي إنت عايزة تقشيريه في الميه البادرة لمدة عشر دقائق وبعد كده تطلعيه وهتلاقيه بيتقشر بمنتهى البساطة.

السؤال الثالث
ليه جلد الفراخ المجمدة بيتشقق وأنا بسلقها؟!

أنا على طول بشتري فراخ مجمدة وكل ما آجي أسلقها ألقى جلدها اتشقق المشكلة لما يكون عندي عزومة بيكون شكل الفراخ مش حلو خالص، كمان ساعات طعم الفراخ بيطلع مش حلو، وبيكون بين اللحم والعظم فيه آثار للدم؟!

واضح جدا يا قمر إنك لما بتطلعي الفراخ من الفريزر بتحطيها في الميه السخنة على طول ودي حاجة غلط جدا بتقع فيها ستات كتير... والمفروض إن الفراخ أو اللحمة أو الأسماك المجمدة تخرج من الفريزر وتحطيها في حلة على ترابيزة المطبخ وتسيبيها لغاية لما التلج اللي فيها يفك من نفسه..

طبعا دلوقتي بتقولي بينك وبين نفسك إن كده هتاخد وقت كبير وعلشان تتغلبي على مشكلة الوقت دي يبقى يا ريت تخرجيها من الفريزر بالليل وتحطيها في التلاجة وقبل ما تسويها ب 3 ساعات تخرجيها وتسيبيها شوية وهتلاقيها فكت كل التلج اللي فيها وبكده تقدري تستعمليها زي ما أنت عايزة.

واوعي تسمعي كلام حد يقولك إنك تغسليها بميه سخنة لأن الحركة دي برضه هتخلي جلدها يتشقق ويبقى طعمها مش حلو.
وفيه حاجة كمان ممكن تعمليها علشان تخلي طعم الفراخ المجمدة حلو وهي إنك تحطي بصلة مقشرة ومقطعة إلى أربع تربع مع الفراخ وأنت بتسلقيها.

السؤال الرابع
ليه الأكل بياخد سواء كتير على النار؟!

مش عارفة ليه كل ما آجي أعمل أكل ألاقي الأكل بياخد وقت طويل معايا مش عارفة ليه لدرجة إني زهقت من موضوع إني أدخل المطبخ ده؟!

شوفي يا قمر علشان الأكل ما ياخدش وقت طويل منك على البوتوجاز يبقى يا ريت ماتحطيش الملح والأكل لسه ما استواش...واستني لما الأكل يقرب يستوي وبعد كده ضيفي إليه الملح والفلفل اللي أنت عايزاه وعلى فكرة الحركة دي هتختصر وقت الأكل معاكي وهتحافظ على القيمة الغذائية للأكل...

كمان ياريت ما تفضليش تفتحي الغطاء اللي على الأكل كل شوية لأن الحركة دي هي كمان بتخلي الأكل ياخد وقت طويل على النار وكمان ممكن تتسبب في فقدان الخضروات للقيمة الغذائية اللي فيها..

واوعي تسمعي كلام حد يقولك أنك تضيفي "بيكربونات الصودا" على الطعام علشان يستوي بسرعة لأن الموضوع ده بيؤدي إلى فقدان الخضروات للكثير من الفيتامينات اللي موجودة فيها.

السؤال الخامس
ورق العنب طلع خشن اوي؟!

أنا اشتريت ورق عنب بس الورقة بتاعته طلعت خشنة اوي مش عارفة أعمل إيه أرميه وأشتري غيره؟!

علشان تتخلصي من المشكلة دي يا ريت تضيفي إلى مية سلق ورق العنب معلقة كبيرة ملح ومعلقتين زيت ذرة أو عباد الشمس، واوعي تنسي وأنت بتسويه تعصري عليه عصير ليمونة وهتشوفي الفرق بنفسك.

السؤال السادس
الجمبري ليه ريحة مش بحبها؟!

أنا بحب الجمبري جدا بس المشكلة إني وأنا باسلقه أو أقليه بشم ريحة مش حلوة مش عارفة ليه؟

الحل بسيط جدا كل اللي عليك تغسلي الجمبري كويس اوي وتعصري عليه عصير ليمون كتير وبعد كده تغسليه كويس وتتبليه بتتبيلة "الثوم بالملح والكمون والفلفل الأخضر" وتضيفي إليه أوراق الكرفس الأخضر المقطع قطعا صغيرة...وهتشوفي الفرق بنفسك..

السؤال السابع
ازاي أعرف إن الزيت سخن؟!

أنتم قلتوا المرة اللي فاتت إن الزيت لازم يتقدح على النار كويس علشان أقدر أحمر فيه الفراخ أو البطاطس طيب ازاي أعرف إن الزيت اتقدح لأني مرة سبته على النار لغاية ما اتحرق؟!

كل اللي عليكي تحطي الزيت على النار وبعد مرور خمس دقائق تضيفي إليه قطعة صغيرة بطاطس ولو احمرت في الزيت يبقى كده الزيت اتقدح كويس وتقدري تحطي الفراخ أو اللحمة اللي أنت عايزاها.

السؤال الثامن
ليه طعم القرنبيط بيطع مش حلو؟!

ليه كل ما آجي أعمل قرنبيط يطلع طعمه مش حلو؟!

علشان تحصلي على طعم حلو للقرنبيط زي ما أنت عايزة يبقى ياريت تضيفي إلى مية السلق "معلقة كمون ومعلقة ملح" علشان يدوا للقرنبيط طعم حلو وريحة حلوة.

السؤال التاسع
الببيض بيفرقع وهو بيتسلق؟!

مش عارفة ليه كل ما آجي أسلق البيض يفرقع مني وهو في المية على البوتوجاز؟!

أكيد جبتي البيض من التلاجة وحطيتيه في الميه السخنة علشان كده فرقع وعلشان تتخلصي من المشكلة دي يبقى يا ريت تطلعي البيض الأول من التلاجة وتسيبيه شوية لمدة نص ساعة وبعد كده تحطيه في حلة فيها ميه من الحنفية وتضيفي إليه معلقة ملح وبعد كده تحطيه على النار.

السؤال العاشر
ليه الزيت بيتطاير شمال ويمن وأنا !بقلي؟

أنا كل ما آجي أحمر أو أقلي حاجة ألقى الزيت بيتطاير شمال ويمين لدرجة ان ايدي بقى كلها حروق من آثار الزيت؟!

شوفي يا قمر لو عايزة تتخلصي من المشكلة دي نهائي يبقى لازم في الأول تصفي أي حاجة هتحمريها من أي آثار للميه وبعد كده تحطيها في الزيت، وأنت بتحطيها في الزيت تحطيها بالراحة.

مشكووووووووووووووووووووووووووووووووووووووووووووووووووووووووووووووووووووور

» اسرار الطبخ
» اسرار الطبخ
» دليل الطبخ
» فهرس مواقع الطبخ والحلويات
» موسوعة الطبخ العربي بالصور