تعظيم سلام لأجدع رجل مطافى مباراة (الأهلى والترجى)

واحــــد إتنـــين الأمن المصرى فين ....

ذهبت كأى مواطن مصرى إلى الاستاد لكى يستمتع بمباراة فريقه المفضل ويقضى وقت ممتع وسط جماهير (الألترس - وكورفا ريد)

الذين يبعثون الحياه داخل من يريد أن يعبر عن حبه لناديه ... ولكن الفرصه لم تأتى بسهوله فالبدايه من بداية دخولنا الساحه المؤديه

للإستاد وبالاخص لمدخل مدرجات الثالثه شمال وبدأت المهازل فى ( عدم التنظيم لدخول المدرج وذلك ادى لتكدس الجماهير وبدأ الدفع

والجذب وبدأت مطالبة رجال الامن فئة (الامناء - العساكر) بمطالبتنا بالطلوع على الرصيف وإلا .....

وأثناء سيرنا نحو بوابة الدخول الاولى بدأت نقاش حاد مع بعض الأمناء وذلك بسبب ان عسكرى من العساكر دلهم أن معى شنطه بها جرنال(ههههه)

يالا السخريه قلتله فى ايه قام نده للامناء وقال معاه جرنال انا بصراحه ياجماعه قلت باين هدخل المعتقل لانى أحمل جرنال ورياضى كمان

مابالكم لو كان معارض . جه اتنين دار معهم حوار الاول اخذ الجرنال عنوه والا اطلع من الطابور ومخشش الاستاد

فقلتله كل ده ليه ايه السبب / قاللى ممنوع ودى تعليمات ممنوع اى جرنال يخش قلتله خايفين نولع فيه قاللى اه قلتله مش احناياريس .

إحنا جايين نتسلى ونقرا على مايبدا الماتش المهم دخل امين اخر فى الحديث قلتله احنا بنتبهدل هناك وقلتله انتوا بتفتشوهم هنا زينا كده

قاللى هما هناك بيخشوا ازاى ؟ قلتله معرفش قاللى عراه يعنى مش معاهم حاجه ضحكت بسخريه قلتله طب والشماريخ مردش

وياخوفى هنا!!!قاللى ماتحفش مش هيخشوا بحاجه قلتله بسخريه احنا فالحين على نفسنا بس لكن هما بنعاملهم باحترام فى بلدنا وبنتهان عندهم قاللى انت مش سهل انت عايز ايه

انت حزب إيه قلتله انا(حزب وطنى)قاللى طب خش . كملنا السير وقبل البوابه بدأ التفتيش الذاتى ووضع الأيدى على جميع انحاء الجسم.

المهم ماعلينا دخلنا وبدأنا نحضر للمباراه بمراجعة بعض الاناشيد الرائعه من قبل روابط الاهلى وبدأت احداث اللقاء الى ان وصلنا للهدف الثانى

الذى احرزه احمد فتحى . وبعدها بدأ شغب جماهير الترجى وظهرت الشماريخ وبدات تقذف داخل الملعب . تذكروا ماقاله الامين بانهم مش هيخشوا بشماريخ

سيبكم من الشماريخ الكراسى كسرت بالمدرج الخاص بالترجى وبدأت تقذف على رجال الامن الأدهى والامر انهم قاموا بخطف

طفاية حريق من رجل إطفاء والرجل دفاعا عن عهدته حاول ان يقوم بنزع الطفايه من ايدى جماهير الترجى لكنهم سحبوه وبدؤا يتناوبوا عليه بالضرب ولكن الاجمل رغم قسوة الموقف رجل المطافى

الذى بسببه كتبت هذا العنوان ( تعظيم سلام لأجدع رجل مطافى بالمباراه ) نكمل...

تدخل رجل الاطفاء الثانى ( البطل ) لكى يحمى زميله ودخل برجوله وحاول ان يلتقط صديقه ويحاول ابعاد الجماهير عنه لكنه كان لاحول ولا قوه الا بالله جاء من وراءه كلاب واعتدوا عليه بالضرب المبرح هو وصديقه

وللاسف لم يتدخل الامن المصرى والله اعلم ماذا جرى لهؤلاء الابطال بعد كل هذه الاعتداءات فما كان على الرتب والامن المركزى الا تذكر لعبة (ثبت صنم)

فإلى متى يتم اهدار كرامة ودماءالمصرى.

صحيح احنا بنثور عندما يحصل مكروه لمصرى بالخارج. لكننا لاننظر ماذا يحصل داخل بلدنا .

فيا احبائى مادامت تهدر كرامتنا داخليا فا اكيد سوف تهتك خارجيا ولكن الاهدار ده كان مننا فيناكمصريين

من خلال تقصيرنا فى الدفاع عن ابن من ابناء مصر بين الحياه والموت الان فى احد المستشفيات.فالخوف ان الاعتداء المره دى على الامن مش المدنين كالعاده. فهناك تطور فى الاحداث اصبح الان الامن هو الذى يضرب وليس المدنين كالعاده . قال وكنا نتمنى ان مباراة ام درمان تبقى على ارضنا عشان نأدب الجزائريين احمدوا ربنا بدل ماكانوا يهجموا على بيوتنا واهو ده اللى كان ناقص كمان .

خلوا بالكم وانصحكم اتفرجوا ببيوتكم احسن مادمنا معرضين لهذه الاهانات داخل بلدنا.