يوميات شادى *1

موضوع: يوميات شادى *1 الإثنين مايو 25, 2009 5:37 am

بطل قصتنا النهارده هو شادي .. وشادي شا ب روش جدا .. كووول آخر حاجة .. وعايش حياته زي ما هو عايز .. ربنا إداله حاجات كتيرة جدا .. ونعم كتيرة جدا .. بس للأسف هو مش مقدر النعمة اللي هو فيها .. ومقضي حياته سهر وفسح وصحوبية .. مش كده بس .. ده شايف انه يعني فيه ناس أحسن منه كتير .. وإنه تقريبا كده .. ربنا مش مدي له حاجة زيادة عن غيره
وفي ليلة من ذات الليلي .. شادي سهر .. وشرب مع أصحابه وكانت ليلة زي الـ .... لحد ما وقع من طوله وراح في النوم .. خخخخخخخخخخخخخخخخخ
صحي من النوم .. حس إن فيه حاجة غريبة .. لسه مش قادر يميز هي إيه .. بس بيني وبينكم .. اللي حصل إن ربنا حرمه من نعم كتيرة كان مديهاله .. وهو مش مقدرها ولا حاسس بيها
دخل شادي الحمام .. فتح الحنفية
الحنفية – نعم .. عايز ميه أد إيه ؟؟
شادي .. مستغرب جدا – وبعدين في اليوم اللي مش فايت ده .. آدي آخرة الهباب اللي بنشربوه طول الليل .. نعم انتي روخرة .. عايزة إيه ؟؟
- ما ينفعش يا كابتن انت تفتح الميه كده زي مانت عايز .. لازم تحدد لي الأول انت عايز ميه أد إيه .. وتاخد شوية الميه بتوعك وتتكل على الله
- لا ااااااااااااااااا .. ده الموضوع كده غمق أوي .. انتي إيه حكايتك عالصبح .. أنا آخد ميه زي ما أنا عايز
- طب وريني كده .. شوف هتنزل الميه ازاي
شادي يحاول ينزل الميه .. مش قادر .. يحس بالعجز .. يفكر شوية .. أحسن أطاوعها وبعدين ابقى أجيب السباك يغيرها قليلة الأدب دي .. يتكلم بطريقة أحسن شوية
- معلش يا حنفوفتي .. لسه صاحي بقى ومش مركز .. هاخد لتر واحد
- أهو كده .. اتفضل ..
شادي يغسل وشه .. اللتر يخلص ولسه على وشه صابون .. حاجة تنرفز .. امال الناس اللي ما عندهاش ميه بيعملوا إيه .. مساكين والله
يطلع وهو مش مصدق اللي بيحصل له .. يروح يلبس هدومه عشان ينزل
القميص – لا النهارده أنا مش معاك .. خد القميص اللي جنبي
شادي يبدأ يستسلم – ماشي ماشي .. ويمد إيده ياخد القميص اللي جنبه
القميص اللي جنبه – اشمعنى أنا يعني .. ما تاخده هو
- يييييييييييييه
.. يلبس هدومه جري .. وما يصدق ينزل من البيت اللي مليان عفاريت ده
شادي يركب عربيته الفور ويل .. يدور العربية .. يسمع صوت من العربية
العربية – نعم .. رايح فين
شادي – إيه .. حتى انتي كمان ؟؟
العربية – ما ترد وتخلصني .. رايح فين
- رايح الكلية
- لا .. أنا مش هاقدر اروح لغاية هناك
- يعني إيه ؟؟
- يعني أنا آخري 2 كيلو .. وتنزل انت بقى تتمشى .. تركب مواصلة تانية .. ماليش فيه .. أنا مش تحت أمرك تركب وقت ما تحب وتروح مطرح ما تحب
شادي يضرب كف بكف .. يا ناس .. يا عالم .. هو جرى إيه في الدنيا .. أنا إيه اللي بيحصل لي ده
ركب شادي العربية .. حاسس إنه مش في عربيته .. حاسس إنها مش بتاعته .. وزي ما يكون واحد تاني مديهاله يستعملها شوية وخلاص
ضرب إيده طلع شريط .. نسمع حاجة بقى تروق دمنا شوية .. يا تاعبني .. أموت أنا ف تامر حسني
الشريط يشتغل – أصبحنا وأصبح الملك لله .. والحمد لله لا شريك له .. له الملك وله الحمد ............
شادي يطلع الشريط – إيه ده ؟؟ .. أنا حطيت شريط قرآن وللا إيه .. يبص فيه أوي .. هو بتاع تامر .. أمال إيه بقى .. يحط الشريط تاني
الشريط – ما تستغربش يا شادي .. إحنا كلنا بنسبح ربنا .. انت مش معانا وللا إيه ؟؟
شادي – لا والله .. معاكم طبعا .. بس يعني .............
- انت صليت الصبح النهارده ؟؟
- ؟؟؟؟؟؟؟؟؟؟ .. مش قادر يرد
- وكمان ما صليتش الصبح ؟؟ .. ده أكيد يومك مش هيبقى كويس
- آه والله .. ده يوم مش فايت .. باين من أوله
العربية تقف .. ويفتح الباب لوحده
العربية – اتفضل انزل
شادي – إيه .. أنزل ؟؟
- أيوه .. أنا خلاص آخري كده
ينزل شادي ويمشي على رجليه .. خايف يشاور لتاكسي يطلع له حاجة جديدة كده وللا كده .. خليه في اللي يعرفه
ياااااااااااه .. المشوار طويل أوي .. مساكين الناس اللي بيمشوا على رجليهم
يوصل الكلية .. يروح على الكافيتيريا .. جعان وعايز ياكل .. يطلب ساندويتش .. ويبدأ ياكل .. الساندوتش مش عايز يتاكل .. زي الحجر
شادي يبص في الساندوتش باستغراب شديد
الساندوتش – إيه ؟؟ بتبحلق فيا كده ليه ؟؟
شادي متردد .. مش عارف يرد يقول إيه – ممكن لو سمحت .. ممكن يعني من غير ما تتضايق .. ممكن آكل سعادتك
الساندوتش – مش عارف .. ماليش مزاج النهارده .. اتحايل عليا شوية
شادي – عشان خاطري .. أبوس إيدك .. أنا ميت من الجوع
- ماشي .. عشان خاطرك بس .. بس تقول بسم الله الرحمن الرحيم
- يا عم هاقرا القرآن كله .. بس آكل .. أنا خلاص هاتجنن .. مش قادر أستحمل
يرن الموبايل .. آه .. سوسو حبيبتي .. مستني رنتك من الصبح
يقفل ويطلبها
الموبيل – عايز رقم كام يا سيد ؟؟
شادي خد بقى خلاص على الموضوع ده .. يرد بثقة – هاكلم سوسو
- تطلع مين دي ؟؟
- صاحبتي يا أخي ما انت عارفها .. ومسجل نمرتها عليك من زمان
- لأ .. أنا ماليش مزاج أكلمها النهارده
- ليه بس .. ده أنا لازم أكلمها .. الله يخليك اطلبها بسرعة .. عشان خاطري .. وانا هاشحنك واروقك
الموبيل بدلع شديد - لللللللللللللللللللللللللللأ
- وبعدين بقى .. طب أقولك .. دقيقة واحدة بس .. اسمع صوتها بس
- يعني مش ربع ساعة زي كل يوم
- لا .. لأ .. دقيقة واحدة والله
- طيب .. عشان خاطرك المرة دي بس
يخلص شادي المكالمة .. دقيقة واحدة لا غير .. حكم القوي عالضعيف
شوية .. ويحس إن الساندوتش في بطنه زي الحجر .. بطنه بدأت توجعه
شادي يكلم نفسه – إيه الساندوتش ده .. مش هيتهضم وللا إيه ؟؟
يحس بصوت طالع من بطنه .. المعدة بتكلمه – لا يا أستاذ .. النهارده مش هاشتغل أوتوماتيك .. لازم تشغل الهضم مانيوال
- إيه ؟؟ .. مانيوال ؟؟ .. أهو ده اللي كان ناقصني .. بلاش هزار سخيف الله يخليكي
- هزار ؟؟ انت هتصاحبني وللا إيه .. ياللا اشتغل خلينا نخلص
شادي مش فاكر خطوات الهضم .. يروح المكتبة يطلع كتاب عن خطوات الهضم ويرجع
يبدأ شادي يشغل الجهاز الهضمي
يكلم المعدة – اطحني
يكلم البنكرياس – شوية أنسولين الله يخليك
المعدة تبدأ طحن .. والكبد يديها عصارة صفرا .. وشادي مش عارف يلاحق فين وللا فين
الجرسون يلاحظ الحالة اللي هو فيها .. يروح يعرض عليه خدماته
الجرسون – أجيب لسعادتك حاجة ؟
شادي مستمر في أوامر تشغيل الجهاز – اتنين أنسولين وواحد صفرا .. بسرعة
الجرسون – أفندم
شادي – لا لا لأ .. اطحني بالراحة شوية .. أنا يظهر ظبطت السرعة زياده
الجرسون يبص له في ذهول ويسيبه ويمشي
شادي – وبعدين في الشغلانة دي .. الكتاب بيقول الموضوع هياخد ساعتين .. ومعاد الدكتور دلوقت عشان المشروع .. أما ازود العصارة المعوية شوية خلينا نخلص .. يفتح العصارة المعوية على الآخر
شادي يروح للدكتور مع زملائه عشان المشروع
الدكتور – إيه يا شادي .. ياللا ورينا البريزينتيشن اللي حضرته .. إن شاء الله تكون عملت شغل كويس
شادي وشه أحمر جدا .. سرعة طحن المعدة مع زيادة العصارة المعوية عملت له حاجات مش ظريفة في الأمعاء
شادي – خف شوية العصارة المعوية .. بطني واجعاني جدا
الدكتور – إيه ؟؟ أخف إيه ؟؟
شادي – لا لا لأ .. كفاية طحن .. بطني هتنفجر
الدكتور – إيه يا شادي .. إنت شارب حاجة
شادي – عصارة صفرا .. عصارة صفرا
شادي فجأة يحس إنه عايز يدخل الحمام بسرعة .. يظهر النسب اللي حاول يزودها بوظت له بطنه
يجري شادي من قدام الدكتور المذهول .. وينطلق بأقصى سرعة إلى الحمام
يفاجأ إن الحمامات كلها مشغولة .. يخبط بقوة على الباب .. افتح الباب .. افتح
افتح .. افتح .. افتح الباب
والدته تدخل عليه الأوضة منزعجة جدا وتصحيه من النوم
والدته – إيه يا شادي .. جرى إيه يابني .. ما الباب مفتوح أهه
شادي يبص حواليه .. ويفرك عينيه وهو بينهج بشدة
شادي – إيه ده كابوس رهيب .. الحمد لله .. الحمد لله
والدته – آدي آخرة السهر .. والهباب اللي بتشربه انت واصحابك .. مش تفوق بقى يابني وترجع لربنا شوية
شادي – شوية .. شوية إيه .. ده انا لازم أرجع له كتير .. الحمد لله .. الحمد لله

والحمد لله إن شادي شاف الحلم ده عشان يفوق ويرجع لربنا .. بس الحقيقة هو مش حلم .. هي حقيقة فعلا .. إن ربنا سبحانه وتعالى أنعم علينا بنعم كتير جدا احنا مش حاسين بيها .. ومتصورين ان الدنيا ماشية كده لوحدها .. ومش حاسين أبدا إن تدبير ربنا ورعايته لينا هي اللي مخلية كل حاجة سهلة والحياة جميلة
ياترى يا شباب احنا حاسين بنعم ربنا عليها وبنؤدي شكرها ؟؟
يا ترى احنا حاسين أد إيه ربنا بيحبنا .. وسخر لنا الكون كله يخدمنا .. ياترى احنا بنحبه وللا لأ ؟؟
تساؤلات باطرحها على نفسي قبلكم .. وياريت نعيش فيها في التعليقات على السلسلة
وطبعا شادي صحي عشان الحبكة القصصية .. بس إن شاء الله نستمر في سلسلة نعم ربنا .. من غير أحلام ولا كوابيس مرة تانية

» يوميات شادى *2
» الارز علي طريقة ام شادى (كشرى، صيادية، برام، بالخلطة) بالصور
» يوميات إبليس
» يوميات موظف
» يوميات صرصور